როგორც ფრანგი სკულპტორი, ოგიუსტ როდენი ამბობდა, „ხელოვნება იწყება იქ, სადაც არის შინაგანი სიზუსტე“...

გადასარევად უთქვამს, რა გინდა, რომ დაუწუნო, მაგრამ ვისაც ეს შინაგანი სიზუსტე არ დააფერთხა განგებამ, რა ქნას, რა წყალში გადავარდეს?!

მოდით, არსად გადავარდნა და გადაჩეხვა არ ღირს, ძალიან მარტივ გამოსავალს შემოგთავაზებთ. ნუ, ყოველ შემთხვევაში, გამოსავალი ისეთია, წყალში გადავარდნას ნამდვილად ჯობია. დანარჩენს რაც შეეხება, „დამუღამების“ ამბავია მხოლოდ. ხომ გაგიგიათ, შეუძლებელი არაფერია და რაც ერთ ადამიანს შეუძლია, იმას მეორეც აუცილებლად შეძლებს.

ჰოდა, იმის თქმა გვინდა, რომ თუკი შინაგანი სიზუსტე არ გაქვთ, რა პრობლემაა - ნიველირი და მისი ჯანი - სიზუსტის ისეთ მწვერვალებს დაგაპყრობინებთ, თქვენი მოწონებული.

ნიველირი, იგივე ოპტიკური თარაზო - ინსტრუმენტი, რომელიც გეოდეზიასა და მშენებლობაში გამოიყენება და საშუალებას იძლევა, სიბრტყეზე წერტილებს შორის არსებული სხვაობა გაიზომოს. ანუ, თავისი არსით, ეს მოწყობილობა დაგეხმარებათ, გაზომოთ თქვენთვის სასურველი სიბრტყის უსწორმასწორობა და რაც მთავარია, საჭიროების შემთხვევაში, დააზუსტოს და გაასწოროს.

სად გამოიყენება ოპტიკური თარაზო?

სიმაღლისა და უსწორმასწორობის გაზომვასთან დაკავშირებული სამუშაოების მრავალი სახეობა არსებობს, მაგრამ ძირითადი შემდეგია:

• გეოდეზია;
• მშენებლობა;
• მილების გაყვანა;
• ლანდშაფტის დიზაინი;
• გზების დაგება;
• არქეოლოგია.

ყველაზე მთავარია და პრინციპში, ნებისმიერ ინსტრუმენტზე სულ ამას გეუბნებით ხოლმე, დაზუსტებით იცოდეთ, ზუსტად რისთვის უნდა გამოიყენოთ ნიველირი, რა პირობებსა და როგორ ადგილებში მოგიწევთ მასთან მუშაობა. ძირითადად, 4 ტიპის სამუშაოები არსებობს:

1. კორექციის ჩვეულებრივი ამოცანები - ასეთი დონის სამუშაოებისთვის შექმნილი ნიველირი ყველაზე მარტივი და ხელმისაწვდომია. მსგავს სამუშაოებს თითქმის ყველა ტექნიკური ნიველირი გაუმკლავდება და ფასიც ყველაზე დაბალი აქვს.

2. მომატებული სიზუსტის ამოცანები - ამ სამუშაოსთვის შექმნილი ინსტრუმენტი ბევრად ზუსტ გაზომვებს აკეთებს. მე-2 და მე-3 კლასის ოპტიკური თარაზოების უმეტესობა მსგავს სამუშაოებს უმკლავდება ყველაზე ციცაბო ფერდობებზეც კი.

3. გაფართოებული სიზუსტის ამოცანები - ასეთი სამუშაოები მოიცავს ყველა სამშენებლო პროცესს სამრეწველო მასშტაბით. ნიველირი ძალიან მაღალი სიზუსტით უნდა იყოს გამორჩეული მხოლოდ მინიმალური ცდომილებით. მსგავსი დავალებების შესრულება შეიძლება 1-ელი კლასისა და მე-2 კლასის ზოგიერთი მოდელი დამატებითი აღჭურვილობით.

4. უმაღლესი სიზუსტის ამოცანები - ამ შემთხვევაში, ჩვეულებრივ, გეოდეზია და არქეოლოგია იგულისხმება. მსგავსი ამოცანებისთვის მაქსიმალური სიზუსტის სპეციალური ხელსაწყოები იქმნება. როგორც წესი, ეს არის 1-ელი კლასის ნიველირი ყველაზე საუკეთესო მახასიათებლებით, რომლის ღირებულებაც საკმაოდ მაღალია.

რას უნდა მიაქციოთ ყურადღება ოპტიკური თარაზოს შეძენისას

ისეთი სამუშაოს შესრულებისას, როგორიცაა მაგალითად, აგარაკის აშენება, ეს ინსტრუმენტი ხელსაწყოების ნაკრების განუყოფელი ნაწილი უნდა იყოს. ხოლო თუ უკვე აპირებთ ნიველირის შეძენას, მაშინ ის უნდა იცოდეთ, რას მიაქციოთ ყურადღება და რა გაითვალისწინოთ.

• ფოკუსური მანძილი - ის გვაწვდის ინფორმაციას იმის შესახებ, რამდენად ახლოს ხედავთ ობიექტს გამოსახულების დაბინდვის გარეშე. ფოკუსური მანძილი პირდაპირ გავლენას ახდენს ხედვის კუთხეზე და რაც უფრო მცირეა ფოკუსური მანძილი, მით უფრო დიდ ხედვის კუთხეს დაფარავს. ნიველირების მოწყობილობების ყველაზე მცირე ფოკუსური მანძილი 20 სანტიმეტრია, ყველაზე მეტი - 1 მეტრი. საყოფაცხოვრებო სამუშაოებისას ეს მაჩვენებელი არც იმდენად მნიშვნელოვანია, რაც იმას ნიშნავს, რომ მისთვის ზედმეტი ყურადღების დათმობა არ ღირს. თუმცა, მასშტაბური სამშენებლო სამუშაოების შემთხვევაში, ამის უგულებელყოფა კატეგორიულად არ შეიძლება. აქვე მაინც ვთქვათ, რომ რაც ნაკლებია ფოკუსური მანძილი, მით უკეთესია.
• მოახლოება - მოახლოების ფუნქციაც ნიველირის შერჩევისას მნიშვნელოვანი ფაქტორი გახლავთ. არსებობს უამრავი კარგი ხარისხის ხელსაწყო კარგი ფუნქციონალით, თუმცა ობიექტის მოახლოებისა და ფოკუსირების პროცედურა ძალიან დიდ სიზუსტეს მოითხოვს, რასაც ხშირად, საკმაოდ დიდი დრო მიაქვს. ოპტიკური თარაზოს ზოგიერთი მოდელი ამ დავალებას რამდენიმე წამში ასრულებს, თქვენ წარმოიდგინეთ, ისეც კი, რომ შესაძლოა, ლინზაში გახედვაც არ მოგიხდეთ. ამდენად, უმჯობესია, შეძენის წინ, საჭიროების შემთხვევაში, დააზუსტოთ, აქვს თუ არა ასეთი ფუნქცია ხელსაწყოს.

დამიზნების ხაზის დაყენების მეთოდი

დამიზნების ხაზის დაყენების მეთოდის მიხედვით, ნიველირები ამგვარად იყოფა:

• თარაზოს გამოყენებით - დამიზნების ხაზი სწორდება ცილინდრული თარაზოს დახმარებით;
• კომპენსატორი - ხაზი კომპენსატორის მიერ ადამიანის გარეშე სწორდება, აქვს გაცილებით ზუსტი საბოლოო შედეგი.

გადიდება

რამდენად შორს დაინახავთ მოწყობილობის მეშვეობით, მეტად მნიშვნელოვანი მომენტია. გადიდების მინიმალური მაჩვენებელია 20X, მაქსიმალური - 38X. თუ სამუშაოები მცირე ფართობზე იწარმოება, მაშინ შეგიძლიათ, უპირატესობა 20x-დან 24x-მდე გადიდების მქონე მოწყობილობებს მიანიჭოთ. უფრო მაღალი მაჩვენებლები პროფესიონალებს სჭირდებათ, რომლებიც დიდ ფართობებზე მუშაობენ, თუმცა ხშირად, ბაზარზე 24x-და 32x გადიდების მქონე ხელსაწყოები გვხვდება.

პრიზმის ხარისხი

ოპტიკური თარაზოს შერჩევისას, ასევე ძალიან მნიშვნელოვანია, ყურადღება ოპტიკური პრიზმის ხარისხს მიაქციოთ. არსებობს მაღალი დონის მოწყობილობები მაღალი ხარისხის პრიზმით, რომელიც საშუალებას იძლევა, გამოსახულება დამახინჯებისა და ფოკუსის არევის გარეშე იხილოთ, თუნდაც წყლის წვეთების მიღმა. ეს ასპექტი შეიძლება ძალიან სასარგებლო აღმოჩნდეს, რადგან დაგიზოგავთ საკმაო დროსა და ძალისხმევას და ხელს შეუწყობს მოწყობილობის სიჩქარესა და სიზუსტეს. პრიზმის ხარისხი გავლენას ახდენს მოწყობილობის ფასზეც, მაგრამ უმჯობესია ამის გამო თანხის დაზოგვაზე არ იფიქროთ.

სიზუსტე

ამ კრიტერიუმის მიხედვით, ნიველირი 3 ჯგუფად იყოფა:

• 1-ელი კლასის ნიველირი - მაღალი სიზუსტის ნიველირი 0,3 მმ-ზე ნაკლები ცდომილებით 1 კმ-ზე. შესაფერისია სამუშაოებისთვის, სადაც მცირედ შეცდომასაც კი მნიშვნელობა აქვს;
• მე-2 კლასის ნიველირი - ზუსტი ნიველირი 1 კმ-ზე 3მმ ცდომილებით. აღჭურვილია მხოლოდ პირდაპირი გამოსახულების ტელესკოპით. გამოდგება სახლების ასაშენებლად, გზების გაყვანისთვის;
• მე-3 კლასის ნიველირი (ტექნიკური) - ნიველირი 10მმ ცდომილებით 1 კმ-ზე. თუმცა, ის მაინც გამოსადეგია სამშენებლო და სხვა მცირე მასშტაბის სამუშაოებისთვის.

მოწყობილობის სიზუსტესთან პირდაპირ კავშირშია მისი ღირებულება. ამდენად, აუცილებლობის გარეშე მაღალი სიზუსტის მქონე ნიველირის შეძენა, ნამდვილად არ ღირს.

სამუშაო ტემპერატურების დიაპაზონი

ტემპერატურის დიაპაზონი, რომლითაც მოწყობილობას შეუძლია ნორმალურად მუშაობა. ოპტიკური თარაზო უნდა მოარგოთ პირობებს, რომლებშიც მას გამოიყენებთ. პროფესიონალურ ხელსაწყოს ტემპერატურის დიაპაზონი -40°-დან +50°-მდე მერყეობს. მუშაობა წლის ნებისმიერ დროს შეუძლია და დიდი ხნის განმავლობაშიც მოგემსახურებათ. ყველაზე ხშირად ნიველირის დიაპაზონი - 20°-დან + 40°-მდეა. არის მოდელები უფრო მცირე ტემპერატურის დიაპაზონით: +5°-დან +35°-მდე, მათი გამოყენება უპრობლემოდ შეიძლება თბილ სეზონზე ან შენობაში. ასეთი მოდელები ნაკლებიც ეღირება. თუმცა, თუკი ცივ პირობებში გიწევთ მუშაობა, არის მოდელები ტემპერატურის დიაპაზონით: -35°-დან +5°-მდე.

დასკვნა

თუ ამ ხელსაწყოს შეძენას აპირებთ და ის ნამდვილად გჭირდებათ, არჩევანის გაკეთება არ უნდა იჩქაროთ და ყველაფერი კარგად უნდა მოიფიქროთ. სანამ ოპტიკური თარაზოს შესაძენად წახვალთ, მოწყობილობა დეტალურად უნდა შეისწავლოთ, წაიკითხოთ რჩევები, რაზეც Holst.ge მაქსიმალურად ზრუნავს, ალბათ, დაგვეთანხმებით კიდეც, გაესაუბროთ სპეციალისტს და ასე შემდეგ და ჯიბეზე ხელი მხოლოდ ამის შემდეგ გაიკრათ.

აბა, წარმატებები!..

CROWN CT44043-ოპტიკური თარაზო

• ბრენდი - CROWN
• პროდუქტის ტიპი - ნიველირი
• დიაპაზონი - 60 m
• გარანტია - 1 წელი
• შტრიხკოდი - 7640177422316
• წონა (კგ) - 1.3
• კომპლექტაცია - ქეისი
• სიზუსტე - ±0.3 mm
• მონაცემები - 32Xგადიდება; ობიექტივის დიამეტრი 40MM
• შტატივის ხრახნი - 5/8''

Dewalt DW096PK-XJ ოპტიკური თარაზო

• ბრენდი - DEWALT
• პროდუქტის ტიპი - ნიველირი
• დიაპაზონი - 100 m
• გარანტია - 1 წელი
• შტრიხკოდი - 5035048144657
• წონა (კგ) - 9.4
• კომპლექტაცია - ჩემოდანი + შტატივი + ამზომი
• სიზუსტე - ±2.0 mm/m
• მონაცემები - 26Xგადიდება; ობიექტივის დიამეტრი 38mm